نیویارک میں ضیاءشاہد مرحوم کی روح کے ایصال ثواب کے لئے فاتحہ خوانی و دعا

نیویارک (محسن ظہیر )امریکہ میں موجود پاکستانی امریکن کمیونٹی کے الیکٹرونک و پرنٹ میڈیا کی جانب سے پاکستان کی ممتاز صحافتی شخصیات اور خبریں گروپ آف نیوز پیپر اور چینل فائیو کے بانی چیف ایڈیٹر ضیاءشاہد کی پہلی برسی پر ان کے لئے فاتحہ خوانی و دعا کی گئی ۔ فاتحہ خوانی میں نیویارک میں پاکستانی قونصل جنرل عائشہ علی سمیت پاکستان کے اخبارات و چینل سے وابستہ سینئر صحافیوں نے شرکت کی ۔
اس موقع پر ضیاءشاہد مرحوم کی روح کے ایصال ثواب کے لئے فاتحہ خوانی کی گئی اور ان کے درجات کی بلندی کے لئے دعا کرتے ہوئے کہا گیا کہ اللہ تعالیٰ ضیاءشاہد مرحوم کو اپنے جوار رحمت میں اعلیٰ مقام نصیب فرمائیں اور ان کے درجات بلند کریں ۔
پاکستانی امریکن الیکٹرونک و پرنٹ میڈیا کے ارکان کا کہنا تھا کہ ضیاءشاہد نے ایک ورکنگ جرنلسٹ کے طور پر نہ صرف خبریں گروپ اور چینل فائیو کی صورت میں نہ صرف اہم صحافتی ادارے قائم کئے بلکہ ایک بیباک اور جرات مند صحافی کی حیثیت سے صحافت میں نئے رجحانات متعارف کروائے ۔ میڈیا ارکان کا مزید کہنا تھا کہ ضیاءشاہ دکی اہم صحافتی خدمات کو کبھی فراموش نہیں کیا جائیگا ۔
بعد ازاں جامع مسجد بیت الکرم نیویارک میں ضیاءشاہد مرحوم کی روح کے ایصال ثواب کے لئے خصوصی فاتحہ خوانی اور دعا بھی کی گئی