پاک بھارت کے درمیان 9جون کو ہونیوالے میچ سے ایک روز قبل 8جون کو پی ٹی آئی کی جانب سے ٹائمز سکوائر نیویارک پر مظاہرے کا اعلان کر دیا گیا
نیویارک ( محسن ظہیر ) پاکستان تحریک انصاف نیویارک اور یو ایس اے کی جانب سے نیویار ک میں ہونیوالے ٹی ٹوئنٹی ورلڈ کپ میں پاکستان اور بھارت کے میچ سے ایک روز قبل نیویارک میں بانی پی ٹی آئی عمران خان کے حق میں مظاہرے کا اعلان کر دیا گیا ہے۔ پی ٹی آئی نیویارک کے امجد نواز، پی ٹی آئی نیوجرسی کے نوید وڑائچ اور پی ٹی آئی یو ایس اے کے ضیاءالرحمان کی جانب سے جاری کردہ اعلان اور سرکولیٹ کئے جانیوالے فلائیر کے مطابق بانی پی ٹی آئی کے حق میں مظاہرہ آٹھ جون کی شام سات بجے نیویارک کے مصروف ترین علاقے ٹائمز سکوائر پر کیا جائیگا۔
مظاہرے سے پی ٹی آئی کے ڈاکٹر شہباز گل اور پی ٹی آئی اوورسیز کے سیکرٹری سجاد برکی خصوصی خطاب کریں گے ۔مظاہرے میں امریکہ بھر سے پی ٹی آئی کے عہدیداران اور ارکان کو شرکت کی دعوت دی گئی ہے ۔ واضح رہے کہ 9جون کو نیویارک کے ناسا کاؤنٹی انٹر نیشنل کرکٹ سٹیڈیم میں پاکستان اور بھارت کے درمیان میچ ہوگا ۔34ہزار شائقین کی گنجائش رکھنے والے اس سٹیڈیم میں بڑی تعداد میں شائقین کرکٹ میچ دیکھنے کے لئے امریکہ اور دنیا بھر سے نیویارک آرہے ہیں ۔
دریں اثناءیہ بھی معلوم ہوا ہے کہ پی ٹی آئی کے جو ارکان یا حامی ، نو جون کو پاکستان اور انڈیا کا میچ دیکھنے کے لئے سٹیڈیم جائیں گے ، وہ دوران کھیل بھی عمران خان کے حق میں نعرہ بازی اور ان کی رہائی کے لئے نعرہ بازی کا ارادہ رکھتے ہیں ۔ یہاں یہ امر بھی قابل ذکر ہے کہ نیویارک سٹیٹ اور ناسا کاؤنٹی کی جانب سے 9جون کو نیویارک میں ہونیوالے پاکستان ، انڈیا میچ کے موقع پر سیکورٹی الرٹ جاری کیا گیا ہے۔ اس میچ کے موقع پر نیویارک سٹی، ناسا کاؤنٹی اور سٹیٹ کی جانب سے سیکورٹی کے سخت انتظامات بھی کئے جا رہے ہیں ۔
