ماضی کی غلطیوں سے سبق سیکھ کر آگے بڑھنا ہو گا ، وزیراعظم شہباز شریف

نوجوان ہمارامستقبل ہیں ، ملک کی ترقی و خوشحالی کی کنجی ان کے ہاتھ میں ہے، ماضی کی غلطیوں سے سبق سیکھ کر آگے بڑھنا ہو گا ، وزیراعظم شہباز شریف کا بہائو الدین زکریا یونیورسٹی میں تقریب سے خطاب, طلبا میں لیپ ٹاپ تقسیم کئے

ملتان (اظہار عباسی سے ):وزیراعظم محمد شہباز شریف نے کہا ہےکہ نوجوان ہمارامستقبل ہیں اور ملک کی ترقی و خوشحالی کی کنجی ان کے ہاتھ میں ہے، ماضی کی غلطیوں سے سبق سیکھ کر آگے بڑھنا ہو گا، آئندہ حکومت ملی تو ایک لاکھ نہیں ،50 لاکھ لیپ ٹاپ تقسیم کروں گا، سابق حکومت نے بڑے صنعتکاروں میں 3 ارب ڈالر بانٹے، یہ رقم تعلیم پر خرچ ہوتی تو آج پاکستان کوآئی ایم ایف کے پاس نہ جانا پڑتا ، شبانہ روز محنت سے قرضے لینے والی نہیں، دینے والی قوم بنیں گے۔

ان خیالات کا اظہار انہوں نے ملتان میں بہائو الدین زکریا یونیورسٹی میں جنوبی پنجاب سے تعلق رکھنے والے باصلاحیت نوجوانوں میں وزیرِ اعظم یوتھ لون سکیم کے تحت چیک اور لیپ ٹاپ تقسیم کرنے کی تقریب سے خطاب کرتےہوئے کیا۔اس موقع پر وفاقی وزیر اطلاعات و نشریات مریم اورنگزیب، گورنر پنجاب انجینئر بلیغ الرحمن، نگران وزیراعلیٰ پنجاب محسن نقوی اور وزیراعظم کی معاون خصوصی برائے امور نوجوانان شزہ فاطمہ ، وزیراعظم کے معاون خصوصی عطاتارڑ کے علاوہ اساتذہ اور طلبا و طالبات کی بڑی تعداد موجود تھی ۔و زیراعظم نے کہا کہ اسی یونیورسٹی میں انہوں نے میرٹ پر پہلے بھی طلبا و طالبات کو لیپ ٹاپ دیئے تھے اور آج دوبارہ انہیں یہ موقع ملا ہے کہ وہ یہاں کے ہونہار طلباو طالبات میں لیپ ٹاپ تقسیم کریں۔

وزیراعظم نے طلباو طالبات پر زور دیاکہ وہ محنت اور لگن سے تعلیم حاصل کریں تو کسی سفار ش اور رشوت کی ضرورت نہیں۔ آج اس تقریب میں ایک والد کی شفقت سے محروم بچی کی داستان سن کر انہیں بڑی خوشی ہوئی جس نے صرف اور صرف محنت کے بل پر کامیابی حاصل کی۔ وزیراعظم نے کہا کہ رشوت ، سفارش اور اقربا پروری سے قومیں تباہ ہو جاتی ہیں۔ جو قومیں ماضی غلطیوں سے سبق حاصل کر کے آگے بڑھتی ہیں ان قوموں کی ترقی کا راستہ کوئی نہیں روک سکتا۔ نوجوان ہمارا مستقبل ہیں ۔ ملک کی ترقی اور کامیابی کی کنجی ان کے ہاتھ میں ہے۔ ایک لاکھ لیپ ٹاپ کی تقسیم آٹے میں نمک کے برابر بھی نہیں ، اگر وسائل میسر ہوں تو میں ایک لاکھ نہیں ایک کروڑ لیپ ٹاپ تقسیم کروں۔

انہوں نے کہا کہ کل اسلام آباد میں انہوں نے پاکستان انڈوومنٹ فنڈ کا اجرا کیا ۔یہ پروگرام ہم نے پنجاب میں شروع کیا تھا جب میں خادم پنجاب تھا۔ اس پروگرام سے لاکھوں طلبا وطالبات کو 22 ارب روپے کے وطائف دیئے گئے۔یہ وظائف حاصل کرنے والے طلبا و طالبات میں سے کئی یورپ کی درسگاہوں میں بھی اعلیٰ تعلیم کے لئے گئے۔ انہوں نے کہا کہ آج ایک نوجوان نے مجھے بتایا کہ وہ اور اس کا والد دونوں مزدوری کرتے ہیں۔ بے شمار طلبا و طالبات ایسے ہیں جو والدین سے محروم ہیں، ان سمیت تمام بچے ریاست کی ذمہ داری ہیں اور ریاست اپنی یہ ذمہ داری پوری کر ےگی۔ نوجوانوں کو اعلیٰ تعلیم کے مواقع فراہم کئے جائیں گے۔ میں نے جنوبی پنجاب سے دانش سکولوں کا آغازکیا تھا۔پسماندہ علاقوں میں واقع ان سکولوں میں ہر طرح کی سہولیات فراہم کیں۔ وزیراعظم نے کہا کہ قومیں جذبے سے بنتی ہیں۔گزشتہ حکومت نے بڑے بڑے صنعت کاروں کو صنعتیں لگانے کے لئے 3 ارب ڈالر دیئے گئے، صنعتیں لگنا اچھی بات ہے لیکن یہ رقم 3 ، 4 فیصد سود پر دی گئی ، اس سہولت سے ان صنعتکاروں نے فائدہ اٹھایا جو پہلے ہی ارب پتی تھے ۔

وزیراعظم نے کہا کہ اگر کسی کو بینک سے 3،4 فیصد پر رقم مل جائے تو آرام سے بازار میں وہ اس رقم پر 15،20 فیصد حاصل کر سکتا ہے۔ صنعتیں لگانے کے لئے قرضے دینا ہی تھے تو مارکیٹ ریٹ پر دیتے اور اگر یہ پیسہ ایسے ہی تقسیم کرنا تھا تو اس پر سب سے پہلا حق نوجوان بچوں اور بچیوں کا تھا۔ یہ 3 ارب ڈالر اگر پاکستان کے چاروں صوبوں میں لیپ ٹاپ اور قرضوں کی تقسیم اور تعلیم پر خرچ ہو تے تو آج ہمیں شائد آئی ایم ایف کے پاس نہ جانا پڑتا۔ وزیراعظم نے کہاکہ کل آئی ایم ایف کے بورڈ نے پاکستان کے لئے قرضے کی منظوری دے دی ہے ، ہم نے ان کی سخت شرائط قبول کیں اور اس قرض کے لئے بہت زیادہ کوششیں کیں۔ اللہ کا شکر ہے کہ ہم ڈیفالٹ سے بچ گئے۔ آئی ایم ایف کا پروگرام ہمارے لئے کوئی حلوہ یا کھیر نہیں ہے ، یہ کڑی شرائط ہیں جنہیں ہم نے برداشت کیا تاکہ ملک استحکام کی طرف گامزن ہو سکے ۔ غربت اور بیروز گاری کے خاتمے کےلئے ہم شبانہ روز محنت کریں گے تو ملک آگے بڑھے گا۔ انہوں نے کہا کہ اگر آئندہ عوام نے انہیں مینڈیٹ دیا تو ایک لاکھ نہیں 50 لاکھ لیپ ٹاپ تقسیم کریں گے اور ملک میں انقلاب لائیں گے۔

انہوں نے کہا کہ جدید تعلیم ہے آگے بڑھنے کا راستہ ہے۔ ملتان میں جب میں نے میٹرو بس منصوبے کا اعلان کیا تو ایک صحافی نے تنقید کی اور کہاکہ یہ محض ایک اعلان ہے ، اس منصوبے پر عمل نہیں ہو گا لیکن اللہ تعالیٰ کے فضل و کرم سے یہ منصوبہ مکمل ہوا اور آج علاقے کے عوام اس سے مستفید ہو رہے ہیں۔ وزیراعظم نے کہا کہ اگر موقع ملا تو وہ ملتان میں میڈیکل سٹی بنائیں گے۔ وزیراعظم نے کہا کہ ترقیاتی منصوبے عوام کاحق ہے اور ہم انہیں یہ حق دیں گے۔وزیراعظم نے شجاع آباد فلائی اوور کی تعمیر کا بھی اعلان کیا۔ انہوں نے کہا کہ معاشرے کے تمام طبقات کو مل کر ملک کی ترقی میں اپنا حصہ ڈالنا ہوگا۔وزیراعظم نے مشکل وقت میں دوست ممالک کابھی شکریہ ادا کیا تاہم انہوں نے کہاکہ کب تک ہم اس طرح گزارا کرتے رہیں گے۔ اب ہم نے شبانہ روز محنت سے ثابت کرنا ہے کہ ہم دنیامیں مانگنے کے لئے نہیں آئے بلکہ ہم دوسروں کو قرض دینے والی قوم بنیں گے۔وہ وقت انشا اللہ ضرور آئے گالیکن اس کے لئے دن رات محنت کو اپنا شعار بنانا ہو گا۔

قبل ازیں تقریب سے خطاب کرتےہوئے وزیراعظم کی معاون خصوصی برائے امور نوجوانان شزہ فاطمہ نے کہا کہ 2011 سے 2018 تک پنجاب حکومت اور وفاق نے 10 لاکھ لیپ ٹاپ میرٹ پر تقسیم کئے ، ان لیپ ٹاپ سے طلبا کو کورونا وائرس کی عالمگیر وبا کے دوران تعلیم کے مواقع میسر آئے۔ وزیراعظم یوتھ لون سکیم کےتحت نوجوانوں کو زراعت سمیت مختلف شعبوں میں بلاسود قرضے دیئے جا رہے ہیں تاکہ وہ اپنا روزگار کمانے کے قابل ہو سکیں۔

تقریب سے اپنے خطاب میں وائس چانسلر بہائو الدین زکریا یونیورسٹی ڈاکٹر محمدعلی نے کہاکہ ای لرننگ کے زمانے میں لیپ ٹاپ انتہائی اہمیت کے حامل ہیں۔ ملک کی ترقی نوجوانوں کی ترقی سے وابستہ ہے اور یہ اسی صورت ممکن ہے کہ ہم نوجوانوں میں سرمایہ کاری کریں۔ تقریب میں پنجاب پولیس کے چاق و چوبند دستے نے طلبا و طالبات کو گارڈ آف آنر بھی پیش کیا۔تقریب میں یونیورسٹی طالبہ فضہ نعیم میں بتایاکہ میرے والد اس دنیا میں نہیں ، میں نے ایف ایس سی بھی سکالرشپ پر کی اور یونیورسٹی میں بھی میرٹ پر سکالرشپ حاصل کیا ۔ میری کوئی سفارش نہیں تھی۔

وزیراعظم نے اپنی نشست سے اٹھ کر طالبہ کو شاباش دی۔ اس موقع پروزیراعظم نے جنوبی پنجاب کی مختلف یونیورسٹیوں سے تعلق رکھنے والے ہونہار طلبا و طالبات میں لیپ ٹاپ تقسیم کئے۔ وزیراعظم نے وزیراعظم یوتھ لون پروگرام کےتحت نوجوانوں کو قرضوں کے چیک بھی  دیئے۔