پاکستانی امریکن کمیونٹی کی ادبی و صحافتی شخصیت اشرف سہیل انتقال کر گئے
ایک ہفتہ قبل سانس لینے میں دشواری کی وجہ سے طبیعت خراب ہوئی جس کے بعد ہسپتال داخل کروایا گیا ،چند روز زندگی و موت کی کشمکش میں مبتلا رہنے کے بعد خالق حقیقی سے جا ملے
نیوجرسی (اردونیوز )پاکستانی امریکن کمیونٹی نیوجرسی کی معروف سماجی شخصیت ، ادیب و صحافی اشرف سہیل انتقال کر گئے ۔ ان کی عمر70سال سے زائد تھی ۔ وہ ایک ہفتے قبل بخار اور سانس کی تکلیف کی وجہ سے سینٹ کلیئر ہسپتال، نارتھ جرسی میں داخل کئے گئے جہاں طبی امداد فراہم کرنے کے باوجود ان کی طبیعت نہ سنبھل سکی ۔ سانس لینے میں دشواری کی وجہ سے انہیں ونٹی لیٹر پر لگا دیا گیا جہاں چند روز زندگی و موت کی کشمکش میں مبتلا رہنے کے بعد ہفتے کو وہ اپنے خالق حقیقی سے جا ملے ۔
مرحوم کے پسماندگان میں بیوہ کے علاوہ دو بیٹے اور دو بیٹیاں شامل ہیں ۔ وہ نیوجرسی کمیونٹی کی معروف شخصیت ارشد شیخ کے سسر تھے ۔ اشرف سہیل گذشتہ پچیس سالوں سے ’جہاں نما‘ کے نام سے نیوجرسی سے میگزین شائع کررہے تھے ۔
عارف افضال عثمانی ، سلیم صدیقی ، بشیر قمر، وکیل انصاری ، جمیل عثمانی ، الطاف ترمذی ، آفتاب قمر زیدی ،اعجاز بھٹی، ڈاکٹر محمد شفیق ،فرح کامران ، شاہد سلیم خان ،یونس ہمدانی ،آصف بیگ، چوہدری افضل گلبہار، سیم خان،راجہ رزاق،شاہد کامریڈ ، طاہر حنفی ، سمیت کمیونٹی کی اہم شخصیات اور ارکان نے اشرف سہیل کے انتقال پر گہرے دکھ اور غم کا اظہار کیا ہے اور دعا کی ہے کہ اللہ تعالیٰ مرحوم کو اپنے جوار رحمت میں اعلیٰ سے اعلیٰ مقام نصیب فرمائیں ۔
New Jersey – Ashraf Sohail passes away in New Jersey
