سفیر مسعود خان 13جولائی کو پاکستان واپس روانہ ہونگے

سبکدوش ہونیوالے پاکستانی سفیر مسعود خان 13جولائی ہفتہ کو پاکستان روانہ ہو رہے ہیں

نیویارک ( محسن ظہیر ) امریکہ میں سبکدوش ہونیوالے پاکستانی سفیر مسعود خان 13جولائی ہفتہ کو پاکستان روانہ ہو رہے ہیں ۔ سابق وزیر اعظم عمران خان کے دور میں واشنگٹن ڈی سی میں تعینات ہونے والے مسعود خان ، نگران وزیر اعظم انوار الحق کاکڑ اور وزیر اعظم شہباز شریف کے ادوار میں واشنگٹن میں سفارتی ذمہ داریاں نبھاتے رہے تاہم اب حکومت پاکستان نے فیصلہ کیا ہے کہ ان کی جگہ امریکی دارالحکومت میں نیا سفیر لایا جائے۔ دفتر خارجہ پاکستان کے سینئر سفارتکار رضوان سعید شیخ کو مسعود خان کی جگہ امریکہ میں نیا سفیر مقرر کیا گیا ہے ۔

سفیر مسعود خان کی امریکہ سے روانگی کے بعد نامزد سفیر رضوان سعید شیخ واشنگٹن ڈی سی آئیں گے تاہم پاکستانی سفارتخانے کے ذرائع کا کہنا ہے کہ نئے سفیر کی واشنگٹن آمد کے بارے میں فی الحال کچھ نہیں بتایا جا سکتا۔ مسعود خان کی وطن واپس روانگی کے بعد پاکستانی سفارتخانے واشنگٹن ڈی سی میں چار ج ڈی افئیرز قاسم محی الدین ، قائمقام سفیر کی ذمہ داریاں سنبھالیں گے اور نئے سفیر کی آمد تک فرائض انجام دیتے رہیں گے ۔

پاکستانی سفارتخانے میں سفیر مسعود خان کے اعزازمیں الوداعی استقبالیہ دیا گیا میں ایمبسی کے اعلیٰ حکام اور سٹاف ممبرز نے شرکت کی ۔ اس موقع پر مسعود خان نے اپنے سٹاف کا شکرئیہ ادا کیا اور ان کی خدمات کو سراہا۔امریکی ایوان نمائندگان میں پاکستان کے الیکشن اور الیکشن آڈٹ کے حوالے سے قرار داد کی منظوری کے بعد مسعود خان مختلف حلقوں میں تنقید کی زد میں رہے ۔ امریکہ میں پاکستان تحریک انصاف ( پی ٹی آئی ) جہاں واشنگٹن ڈی سی میں لابنگ سمیت دیگر حوالوں سے سرگرم عمل ہے ، کے حوالے سے نئے سفیر کو بھی چیلنج درپیش ہونگے۔

Farewell Reception for Ambassador Masood Khan: Departing for Pakistan on July 13th