اقوام متحدہ میں پاکستان کے مستقل مندوب منیر اکرم کے اعزاز میں الوداعی استقبالیہ، خدمات کو خراج تحسین
نامزد مستقل مندوب سفیر عاصم افتخار احمد، قونصل جنرل عامر احمد اتوزئی، عثمان جدون، مشن کے افسران اور ان کے اہل خانہ سمیت عملہ کے ارکان کی شرکت
اقوامِ متحدہ( اردو نیوز ) اقوامِ متحدہ میں پاکستان کے مستقل مشن نے اسفیر منیر اکرم کے اعزاز میں ایک پروقار الوداعی تقریب کا انعقاد کیا۔ اس موقع پر نامزد مستقل مندوب سفیر عاصم افتخار احمد، قونصل جنرل عامر احمد اتوزئی، نائب مستقل مندوب عثمان جدون، مشن کے افسران اور ان کے اہل خانہ، عملے کے ارکان، اور سفیر منیر اکرم کی اہلیہ نے شرکت کی۔
اپنے خطاب میں سفیر عاصم افتخار احمد نے سفیر منیر اکرم کو خراجِ تحسین پیش کرتے ہوئے ان کی پاکستان کے لیے کئی دہائیوں پر محیط شاندار سفارتی خدمات کو سراہا۔ انہوں نے انہیں ایک شفیق رہنما، اعلیٰ پائے کا حکمتِ عملی ساز، اور کثیر الجہتی سفارت کاری کا نمایاں ترین ماہر قرار دیا، جنہوں نے پاکستان کی بے مثال خدمت کی اور غیر متزلزل عزم کے ساتھ ملک کے وقار کو بلند رکھا۔ انہوں نے مزید کہا کہ سفیر منیر اکرم کی شاندار عوامی خدمات کا ورثہ آنے والی نسلوں کے پاکستانی سفارت کاروں کے لیے مشعلِ راہ ثابت ہوگا۔
سفیر منیر اکرم نے اپنی طویل سفارتی زندگی پر روشنی ڈالتے ہوئے اسے ”طویل، پُرمشقت، مگر بے حد ثمر آور“ قرار دیا۔ انہوں نے پاکستان کی خارجہ سروس کے اس اہم کردار کو اجاگر کیا جو وہ ایک پیچیدہ عالمی ماحول میں ملک کے قومی مفادات کے تحفظ کے لیے ادا کر رہی ہے۔ مشن کے افسران سے خطاب کرتے ہوئے، انہوں نے ابھرتے ہوئے چیلنجز سے مو¿ثر طور پر نمٹنے کے لیے ان کی صلاحیتوں کو مزید بہتر بنانے کے حوالے سے مفید مشورے دیے۔اس موقع پر ایک خصوصی ویڈیو بھی دکھائی گئی، جس میں مختلف ممالک کے سفیروں اور پاکستان مشن کے افسران کے تاثرات شامل تھے، جنہوں نے سفیر منیر اکرم کی خدمات اور ان کے سفارتی شعبے پر اثرات کو خراج تحسین پیش کیا گیا۔
UN farewell reception held for Pakistan’s permanent envoy Munir Akram, honoring his services; attended by Ambassador Asim Iftikhar, diplomats, and staff
