امریکہ کے 39ویں صدر جمی کارٹر 100 برس کی عمر میں انتقال کر گئے

جمی کارٹر نے مارچ 2019 میں جارج ایچ ڈبلیو بش کو پیچھے چھوڑ کر امریکہ کے طویل العمر سابق صدر کا اعزاز حاصل کیا اور وہ پہلے امریکی صدر تھے جنہوں نے 100 برس کی عمر پائی
۔۔۔۔
نیویارک (محسن ظہیر سے)امریکہ کے 39ویں صدر جمی کارٹر 100 برس کی عمر میں اتوار کو اپنے گھر میں اپنے خاندان کے درمیان پ±رامن طور پر وفات پا گئے۔ یہ خبر کارٹر سینٹر نے اپنے بیان میں جاری کی۔نیویارک سے بیورو چیف محسن ظہیر کی رپورٹ کے مطابق جمی کارٹر نے مارچ 2019 میں جارج ایچ ڈبلیو بش کو پیچھے چھوڑ کر امریکہ کے طویل العمر سابق صدر کا اعزاز حاصل کیا اور وہ پہلے امریکی صدر تھے جنہوں نے 100 برس کی عمر پائی۔ کارٹر اپنے سیاسی کیریئر سے قبل مونگ پھلی کے کاشتکار اور نیوی کے لیفٹیننٹ تھے۔ وہ جارجیا کے گورنر کے طور پر خدمات انجام دینے کے بعد 1977 سے 1981 تک امریکہ کے صدر رہے۔ ان کی اہلیہ روزالین کارٹر، جو ذہنی صحت کی حمایت اور انسانیت کی خدمت کے لیے مشہور تھیں، نومبر 2023 میں 96 سال کی عمر میں وفات پا گئیں۔ کارٹر جوڑے نے 75 برس سے زائد عرصہ ایک ساتھ گزارا اور وہ امریکہ کی تاریخ میں طویل ترین شادی شدہ صدر اور خاتونِ اول تھے۔
جمی کارٹر کی خدمات کو مختلف حلقوں میں سراہا جا رہا ہے۔ ہبیٹیٹ فار ہیومینٹی نامی فلاحی تنظیم، جس کے ساتھ کارٹر کئی دہائیوں تک جڑے رہے، نے انہیں اپنا “حقیقی دوست” قرار دیا۔ کارٹر ورک پروجیکٹ کے تحت تنظیم نے 14 ممالک میں 4300 سے زائد گھروں کی تعمیر، مرمت یا بحالی کی۔ جمی کارٹر کے انسانی حقوق اور عالمی امن کے لیے خدمات کو دنیا بھر میں یاد کیا جا رہا ہے۔ ان کی قیادت میں کیمپ ڈیوڈ معاہدے جیسے تاریخی اقدامات کیے گئے۔
صدر جو بائیڈن نے ان کی 100ویں سالگرہ کے موقع پر انہیں خراج تحسین پیش کیا تھا اور ان کی وفات پر انہیں ایک عظیم انسان اور خادمِ عوام قرار دیا۔ کارٹر کی آخری رسومات کا اعلان جلد کیا جائے گا، اور ان کی یاد میں عوامی تقریبات جارجیا اور واشنگٹن ڈی سی میں منعقد کی جائیں گی۔

Jimmy Carter, 39th President of the United States and Nobel Peace Prize Laureate, Dies at 100