اسلام آباد (اردو نیوز) یو ایس کانگریس وومین الہان عمر پاکستان پہنچ گئی ہیں جہاں ان کا پرتپاک خیرمقدم کیا گیا ہے الہان عمر دورہ پاکستان کے دوران اہم شخصیات سے ملاقاتیں کررہی ہیں
کانگریس وومین الہان عمر نے صدر مملکت ڈاکٹر عارف علوی ، اسپیکر قومی اسمبلی راجہ پرویز اشرف اور پاکستان تحریک انصاف (پی ٹی آئی) کے سربراہ عمران خان سے ملاقات کی، اسلامو فوبیا اور متعلقہ امور پر تبادلہ خیال کیا گیا۔
صدر مملکت نے کہا کہ پاکستان امریکہ کے ساتھ اپنے دیرینہ تعلقات کو قدر کی نگاہ سے دیکھتا ہے، دونوں ممالک کے درمیان تعمیری روابط خطے میں امن اور ترقی کو فروغ دیں گے، باہمی مفاد کے لیے مختلف شعبوں میں دوطرفہ تعلقات کو مزید بہتر بنانے کی ضرورت ہے۔
ملاقات میں صدر عارف علوی کا کہنا تھا کہ دو طرفہ تبادلوں سے دونوں ممالک کے درمیان افہام و تفہیم میں بہتری آئے گی، مودی حکومت کی طرف سے اقلیتوں بالخصوص مسلمانوں کے خلاف مظالم ڈھائے جا رہے ہیں، بھارت مسلمانوں کی نسل کشی میں ملوث ہے اور ان کے خلاف انسانی حقوق کی سنگین خلاف ورزیوں کا مرتکب ہوا ہے۔
صدر مملکت نے خطے میں امن کے فروغ کے لیے پاکستان کے کردار اور دہشت گردی کے خلاف جنگ میں پاکستان کی قربانیوں کو بھی اجاگر کیا اور کہا کہ آئی ٹی پاکستان میں سرمایہ کاری کے لیے سب سے اہم شعبہ ہے اور امریکی تاجر اس شعبے میں سرمایہ کاری کر سکتے ہیں۔
اس موقع پر الہان عمر نے اسلاموفوبیا کے خلاف پاکستان کے کردار کو سراہتے ہوئے کہا کہ دونوں ممالک کے مابین تعلقات کو مزید بہتر اور مضبوط کرنے کی بے پناہ صلاحیت موجود ہے۔
عمران خان سے امریکی رکن کانگریس الہان عمر کی ملاقات
ملاقات بنی گالا میں ہوئی شاہ محمود قریشی شیریں مزاری بھی موجود pic.twitter.com/qspu8H4KaA— Zahid Farooq Malik (@zfmalik) April 20, 2022
اس سے قبل امریکی رکن کانگریس نے بنی گالا میں چیئرمین پی ٹی آئی عمران خان سے بھی ملاقات کی۔ اس موقع پر شاہ محمود قریشی، شیریں مزاری بھی موجود تھے۔
